Aatma Ki Lau

Ek kanpkapi hai mere andar, jo bahaar aane ko hamesha taiyaar rehti hai

Chaar Sau ho ya Chaalis kitne bhi log ho mere saamne,

Wo daayein pair tak apna rasta khoj hi leti hai

Shabdon pe taala laga deti hai,

Gale se paani sukha kar peshaani pe le aati hai

Shareer dheere dheere thanda padne lagta hai

Thik ussi waqt aatma main ek lau jalti hai,

Yeh lau shareer main aaye toofan se ladti hai

Aur shabdon ke taale ko pighaal deti hai

Peshaani ka paani udd jaata hai

Gale main pighaala hua woh rass pahunch jaata hai

Daayein pair ki kanpkapi tham jaati hai

Aur aatma ek baar phir yeh yudh jeet jaati hai…

 

Kahaan Reh Gaye The

Bhag gaya tha woh apne gaanv ko paraya samajhkar,

Ab maara maara phirta hai parayon ko apna samajhkar.

 

Badi badi imaaraton ne moh liya tha uska mann,

Phir kyun baar baar yaad karta tha nadi kinaare waala bachpan.

 

Mashoori ki chaahat main dhal gayi jawaani,

Shaurat jisne dilayi wo thi Nani ki kahaani.

 

Tehzeeb jab apne gaanv ki bachon ko sikhlayi,

Unhe yeh lecturebaazi raas na aayi.

 

Budhape ke station se jab waapas gaanv ka rukh kiya,

‘Arey kahaan reh gaye the bhaiya’, yeh bolkar gaanv ne swaagat kiya.

 

 

Waqt- Ek Makeup Artist

Kitni khoobsurti se waqt chehre ka makeup karta hai

Bachpan ke kit main se choti-choti aankhein nikalta hai

Aur unhe bade saleeke se fit karta hai

Gaal main hansi ke gubaare bhar deta hai

Aur aankhon main zidd ke aansu

Kitni khoobsurti se waqt chehre ka makeup karta hai

Jawaani ke brush se maarta hai mucchon ka pehla stroke

Aur shararti phoonsiyon se chehra lal kar deta hai

Baalon main style naam ki kanghi chala deta hai

Aur aankhon main sapno ki aag bharta hai

Kitni khoobsurti se waqt chehre ka makeup karta hai

Jeevan ke interval main menopause ka chota sa dabba nikalta hai

Aur mehnat kash raaton ke sundar dhabbe de jaata hai

Peshaani par pareshaani ke kuch mote strokes banata hai

Aur ek aankh main gham toh ek aankh main khushi rang deta hai….

Kitni khoobsurti se waqt chehre ka makeup karta hai….

Phir anth main khanste khanste nikalta hai budhape ki peti,

Jhuriyaan banane ka saaman nikalta hai

Adhoore sapno aur rishton se aankhein geeli karta hai

Phir jeevan ke saat rangon ko milakar

Safed rang banata hai

Aur usse dheere dheere chadaane lagta hai

Tabhi toh uski (waqt ki) dukaan bandh hote hi

Chehra ek anokhi shanti se bhar jaata hai

Kitni khoobsurti se waqt chehre ka makeup karta hai

Neend Tu toh Aaja Yaar 

Neend tu toh aaja yaar,

21 ki umar main samajhne chala hai pyaar,

Neend tu toh aaja yaar…

Chhod de yeh jhoot ka vyapaar

Sapno ki khidki se thoda aage toh jhaank

Neend tu toh aaja yaar

Zindagi ka bas yehi hai saar

Chalta hai yeh safar saalon saal,

Neend tu toh aaja yaar..

21 ki umar main samajhne chala hai pyaar,

Neend tu toh aaja yaar…

Ek Katra Hai Khoon Ka

Ek katra hai khoon ka,
Jo yeh shikayat karta hai,
Tum galat kar rahe ho.

Ek katra hai khoon ka,
Jo mujhse shikayat karta hai,
Tum raah bhatak gaye ho.

Ek katra hai khoon ka,
Jo aksar yeh shikayat karta hai,
Tum jaankar bhi anjaan ban rahe ho.

Ek katra hai khoon ka,
Jo bas shikayat karta hai,
Tum kitni aasaani se gumraah hote ho.

Hum toh desh ke dushman se ladne waale the,
Hum toh kranti laane waale the,
Inn chakaron main kyun pad gaye,
Humwatan ka hi lahoo bahaane tum lag gaye.

Mere Papa

Meri khawishon ka bhoj utha kar chale hain woh,
Mere sapno ko haqiqat main badalne ki koshish main joote hain woh,
Apni zaroorat ko pare rakh kar meri zaroorat ko pura karne main lage hain woh.
Har shaam jab woh office se ghar shanti ki talaash main aate hain,
Toh main unke saamne kranti bankar khada ho jata hu.
Aur unpe apni ziddon ki bumbari karta hu.

image

Kabhi Kabhie main darr jata hu,
Ki woh meri har zidd ko pura karte hain,
Kya woh mujhse kuch zyada hi umeed lagaye baithe hain.
Par phir mere sir par ek tapli padti hai
Aur unki bhaari si awaaz aati hai,
zyada mat socha kar
Bacha hai tu abhi.
Main toh bas itna hi chahta hoon,
Ki teri zindagi sawar jaye
Aur mera sir garv se uncha ho jaaye.