Ghar Ke Buzurg

Train ka coach jab purana ho jata tha toh usse yard main shift kar dete the… Aur woh wahaan khade khade din raat dusri trains ko apne aage nikalte hue dekhta tha…

Par jab hum usmein luka chuppi khelne jaate the, tab usmein bahut si aisi cheezein milti thi jinka koi mol nahi laga sakte the, jaise puraani kitaabein, checks waale muffler aur kabhi kabhi toh paanch rupaye ke note… Un cheezon ko paakar chehre pe ek alag hi muskaan aa jaati hai…

Yeh coach ghar ke buzurgon ki yaad dilaate hain…

(Excerpt from Nirmal Verma’s -Antim Aranya)

Ghar Ki Subah

Iss Kavita se mere ghar ke savere ki gandh aayegi!
Subah savere jab pheli baar Papa uthaane aate hain
Toh unki chillahat ke saath main ek sugandh shaving cream ki aati hai
Jo ‘5 minute aur’ ka bahana sunkar kam hone lagti hai…
Phir neeche jab aata hu,
Tab brush se phele aa rahi khud ke moonh ki durgandh
Mandir se aayi Maa se aa rahi chandan ki khushboo se ladne lagti hai…
Phir Dadaji ke pass jab pranaam karne jata hu
Toh wahaan garam chai ki khushboo
Akhbaar ke baasi propaganda se ladti hai
Iss yudh par alpviram Dadaji ki paad hi lagaati hai…
Phir 100 kadam tehal ke bathroom ki aur wo jab prasthan karte hain
Main mauka dekh kar Sports ka panna nikaal leta hu,
Aur kitchen se aa rahi Jalebi Pohe (because stereotype) ki khushboo ki taraf khicha chala jata hu
Par jab wahaan pahunchta hu toh apne liye bas gandh rahit Green Tea hi pata hu…
Aur Communist Pait kab Capitalist tond ban gayi iske flashback main chala jata hu
Kuch aise katt jaati thi ghar ki subah
Par kya ab Naye sheher ki nayi subah, nayi hawa jab laayegi…
Kya woh apne saath wohi sugandh jise kehta hu main ghar apne saath la payegi…