Udhaar Ke Sher

Log toot jaate hain EMI chukaane main,

Tum zara nahi taras khaate yun bhag jaane main.

Baarish ki ek boond ko taras gaya wo,

Boodein jab chalki, apni bitiya ke saamne latak raha tha wo.

Usne calander banaye, jaam chalkaaye,

Na jaane kin kin nashon se loan pass karwaaye

Zameen girvi rakhi thi banno ki Shaadi main,

Dheere dheere pura parivaar bik gaya kundli ka dosh hataane main.

Iss beech ek akhbaar uthata hai ek insaan,

Thoda bulbulata hai, thoda taras khata hai… phir kehta hai, mera ho gaya…main middle class.

Note: First Sher is copied from Bashir Badr Sahaab’s sher.

Kahaan Reh Gaye The

Bhag gaya tha woh apne gaanv ko paraya samajhkar,

Ab maara maara phirta hai parayon ko apna samajhkar.

 

Badi badi imaaraton ne moh liya tha uska mann,

Phir kyun baar baar yaad karta tha nadi kinaare waala bachpan.

 

Mashoori ki chaahat main dhal gayi jawaani,

Shaurat jisne dilayi wo thi Nani ki kahaani.

 

Tehzeeb jab apne gaanv ki bachon ko sikhlayi,

Unhe yeh lecturebaazi raas na aayi.

 

Budhape ke station se jab waapas gaanv ka rukh kiya,

‘Arey kahaan reh gaye the bhaiya’, yeh bolkar gaanv ne swaagat kiya.